Цахим ажил, цалинтай чөлөө үргэлжлэх үү?

Коронавирусын дэгдэлтийн улмаас манай улс  өндөржүүлсэн бэлэн байдал зарлаад хагас жил гаруй боллоо. Энэ хугацаанд эрсдэлийг бууруулахын тулд цөөнгүй арга хэмжээ авсны нэг нь өнгөрсөн нэгдүгээр сард сургууль, цэцэрлэгийн үйл ажиллагааг түр зогсоож, энэ хугацаанд гэртээ үлдсэн хүүхдүүдийг хамгаалахын тулд хоёр сар гаруй хугацаанд жирэмсэн болон 0-12 насны хүүхэдтэй эцэг, эхчүүдэд цалинтай чөлөө олгоод байсан юм. Албан байгууллагууд ч ихэнх нь бага насны хүүхэдтэй ажилчдаа цахим болон богиносгосон цагаар ажиллуулсан. Тэгвэл хоёр сар гаруй үргэлжилсэн энэ арга хэмжээнд 30 гаруй мянган эцэг, эх хамрагдсан судалгааг Хөдөлмөр, нийгмийн хамгааллын яамнаас гаргалаа. Тус яамны албаны хүн ““Хүүхдийн эрхийг хамгаалах, эрсдэлээс урьдчилан сэргийлэх тухай” албан даалгаврыг батлуулж, аймаг, нийслэлийн Засаг дарга нар, ГБХЗХГ, Нийслэлийн ГБХЗХГ-т чиглэл хүргүүлсэн. 15 аймгийн Засаг даргын захирамж, 19 аймгийн ГБХЗХГ-ын даргын тушаал гарч төрийн байгууллагын 249 хүн, 966 аж ахуйн нэгж байгууллагын 15910 хүн богиносгосон цагаар ажилласан.  Харин гэрээсээ ажиллах боломжоор 16 аймгийн Засаг даргын захирамж, 15 аймгийн ГБХЗХГ-ын даргын тушаал гарч, төрийн байгууллагын 262 албан хаагч, 1118 аж ахуйн нэгжийн 14158 хүн хамрагдсан” хэмээн хэллээ. Тэгвэл энэ тоо цаашид өсөх магадлалтай. Учир нь  энэ хичээлийн жил ЕБС-иуд хоёр өдөр гэрээр хичээллэж, хоёр настныг цэцэрлэгт элсүүлэхгүй байх шийдвэр гаргасан. Мөн 3-4 настнуудын 60 хувь нь л цэцэрлэгт хамрагдах боломжтой гэдгийг салбарын яамнаас мэдэгдээд байгаа юм. Энэ хооронд гэртээ үлдэх хүүхдүүдийн хараа хяналт суларч, эцэг эхчүүдийн ажиллах нөхцөл улам хүндрэл учирна. Нас балчирдсаны улмаас гэрийн боловсролд шилжсэн тэднийг хэн халамжилж үлдэх вэ. Өвөө эмээ, танил ах дүү, аав ээжийн аль нэг нь яах аргагүй асарч үлдэх шаардлагатай. Тиймээс цахим ажил, цалинтай чөлөө үргэлжлэх үү гэсэн асуудал гарч ирж байгаа юм. 

Эцэг эхийн хараа хяналтад аюулгүй, эрсдэлгүй гэж байгаа боловч хэн ажиллаж, өрхийн санхүүгээ дэмжих вэ. Одоогоор хэчнээн насны хэдэн хүүхэд гэртээ үлдэх болсон тоо судалгаа гараагүй байна. Өмнөх журмын адил эцэг эхчүүдэд цалинтай чөлөө олгох, гэрээр ажиллах нөхцөл бүрдэх боломжтой эсэх талаар ГБХЗХГ-ын дарга М.Энх-Амараас тодруулахад “Энэ асуудлын талаар БШУЯ, ЭМЯ-тай ярьж байгаа. Цаашдаа гэртээ үлдэх нөхцөл бүрдсэн бага насны хүүхдүүдийнхээ эрүүл аюулгүй орчинд амьдрах, эцэг эх нь хүүхдээ яаж харах, тэдний ажлын цагийг богиносгох, цахимаар ажиллах боломж бүрдүүлэх зэрэг боломжит хувилбаруудыг судалж байгаад хамтын ажиллагааны журмаар шийднэ” гэж хариуллаа.

Сургууль, цэцэрлэгийн үйл ажиллагаа эхлэхэд сар хүрэхгүй хугацаа үлдсэн байна. Энэ хооронд гэртээ үлдэх бага насны хүүхдүүд тэдгээрийн нөхцөл байдлын талаар судалгаа, тооцоолол хийгдэх аж. Хичээлийн шинэ жилтэй уралдан бага насны хүүхдүүдийн хараа хяналтын талаарх шийдвэр, журмууд эхнээсээ тодорхой болох биз.